ஜெயலலிதாவின் மறு வாழ்வு

Politics

ஜெயலலிதாவின் மறு வாழ்வு

Illustration: Akshita Monga/Arré

ஜெயலலிதா, அம்மா, புரட்சித்தலைவி. இருபது ஆண்டுகளுக்கும் மேலாக தமிழ்நாட்டின் அனைத்து அதிகாரங்களும் சங்கமிக்கும் அரியணையில் அமர்ந்திருந்த இந்த பெண்மணி, மறைந்து இப்போது ஓராண்டு முடிந்துவிட்டது. சென்னை அப்போலோ மருத்துவ மனையின் மீது இந்தியா மற்றும் தமிழ்நாட்டில் பலரின் கவனம் பதிந்திருந்து ஓராண்டு ஆகி விட்டது. இருப்பினும், ஜெயலலிதாவின் மீதுள்ள ஈர்ப்பு இன்னும் இம்மியளவும் குறையவில்லை.
ஒரு பெரிய தலைவரின் மறைவு ஜூலியஸ் சீஸரை நினைவூட்டுகிறது. குறிப்பாக ஷேக்ஸ்பியரின் வார்த்தைகளில் அந்தோணி கூறுகிறார்…
இறந்தவர் செய்த நல்லவை அனைத்தும் அவருடன் புதைக்கப்பட்டுவிடும்.
அவர் செய்த தவறுகள் அவர் இறந்த பின்னும் வாழும்.
சீஸர் செய்த நல்லவை அனைத்தும் அவருடனேயே இருக்கட்டும் என்கிறார்.

ஜெயலலிதா விஷயத்தில் நிலமை மேலும் சிக்கலாக உள்ளது. தமிழ்நாட்டின் மேலாளராகவும், காப்பாளராகவும் இருந்த அம்மாவின் மரபில், புதிர்கள் நிறைந்துள்ளன. ஒரு புறம், தன்னுடைய பலவித சமூக நிலத்திட்டங்களின் மூலம், தமிழ்நாட்டின் ஆயிரக்கணக்கான ஏழைகளுக்கு அவர் தாயைப் போல இருந்தார். மறு புறம் ஊடகங்களை ஊமையாக்கி, தன் இரும்புப் பிடியினால் எதிரிகளை கைது செய்யும் ஏகாதிபதியாக இருந்தார். மன்னார்குடி மாஃபியா என்று அறியப்படும் அவருடைய விசுவாசிகளின் கூட்டத்திற்கு, அவர் ஒரு இரக்கமுள்ள தலைவராக இருந்து, அவர்கள் அனைவரையும் செழிக்க வைத்தார். அதே சமயம் திமுகவின் கருணாநிதி போன்ற அவருடைய எதிரிகளுக்கு, அவர் அசாதாரண எதிரியாக இருந்தார். சில எதிரிகளையாவது உருவாக்காமல் உச்சத்தை எட்ட முடியாது. தன்னுடைய வாழ்நாளில் இந்த அரசியல் விளையாட்டில் ஜெயலலிதா ஒரு சிறந்த வீரராக இருந்தார்.
இருப்பினும், அம்மாவின் முதலாண்டு நினைவு தினத்தில், அவருடைய நினைவுகள் தங்கள் நுணுக்கங்களை இழக்க ஆரம்பித்துவிட்டன. அவருடைய வரலாற்றில், நல்ல காலம், கெட்டக் காலம் இரண்டும் கலந்திருந்தாலும், அவருடைய கம்பீரத் தோற்றமும், மக்கள் அவர் மேல் கொண்டிருந்த அன்பும், அனைவரின் மனதிலும் பசுமரத்தாணிப் போல் பதிந்துள்ளது. எக்ஸ்கேலிபரைப் போல், அதிகாரத்தை திரட்டக் கூடிய எவரும் தேசத்தின் அதிபதியாகி விட முடியும். எனவே தான் அவர் மறைவுக்குப் பின், அஇஅதிமுகவை கட்டுப்படுத்த, சசிகலா மற்றும் ஓ.பன்னீர்செல்வத்தின் இடையே மோதல் மூண்டது. அளவுக்கு மீறிய சொத்துக் குவிப்பு வழக்கில், சசிகலா குற்றவாளியானதால் அவர் அந்த வாய்ப்பை இழந்தார். அஇஅதிமுக மேஜையில் தலைமை இடமான அம்மாவின் இடத்தை பன்னீர்செல்வம் பிடித்தார். சசிகலாவிற்கு கிடைத்த தண்டனை, ஜெயலலிதாவின் மீதுள்ள களங்கத்தை சுத்தப்படுத்துவதை ஒத்துள்ளது. பொதுமக்கள் ஆதரவையும், முதலமைச்சர் பதவியையும், பன்னீர் தக்க வைத்துக் கொண்டார். ஊழல் மற்றும் அதிகார துஷ்பிரயோக மரபை சசிகலா பெற்றுக் கொண்டார். ஜெயலலிதாவின் அடையாளம், சீராக பிரிக்கப்பட்டது. சங்கடம் ஏற்படுத்தும் அவருடைய அம்சம் கண்ணில் படாமல் சிறைக்கு அனுப்பப்பட்டு, சுத்தம் செய்வதை துவக்க வழி வகுத்தது.

உயிருடன் இருந்த காலத்தில், ஜெயலலிதா ஒரு சில அரசியல்வாதிகளை மட்டுமே தன்னுடைய சகாக்களாகக் கருதினார். அவர் மறைந்து ஓராண்டிற்குப் பின், இப்போது மேம்பட்டவர்களுடன் அவர் இருக்கிறார். நம் சுதந்திர போராட்ட தலைவர்களான சர்தார் வல்லபபாய் பட்டேல் மற்றும் மஹாத்மா காந்தியை நாம் கௌரவிக்கிறோம், மரியாதை தருகிறோம் என்றாலும், தற்போதைய இந்தியாவில் மறைந்த பின்னும், ஒரு அரசியல்வாதியின் மீது மக்கள் அன்பைப் பொழிவது அபூர்வமானது. இதற்கு ஒரு பிரபலமான உதாரணம், பால் தாக்கரே அவர்கள். சிவசேனாவை அவர் வழி நடத்திய காலத்தில், அவருடைய எண்ணங்கள் மிக பாரபட்சமாக இருந்தாலும், இந்துத்வா அரசியல் கட்சியை அவர் நடத்திய போதிலும், அவர் இறந்து ஐந்து ஆண்டுகள் ஆன பின்னும், மக்கள் அவருக்கு இன்றும் ஒரு துறவிக்குரிய மரியாதையை தருகிறார்கள்.

சேனாவின் பெருந்தலைவராக (இன்றும் அவர்தான் பெரும் தலைவர் என்பதில் சந்தேகமில்லை) தாக்கரேயின் உற்றுப் பார்க்கும் பார்வையை, சிவசேனையின் கோட்டையான மும்பையால் இன்றும் மறக்க முடியவில்லை. நகரம் முழுவதும் உள்ள போஸ்டர்களில் அவருடைய முகம் இன்றும் காணப்படுகிறது. தனித்துவம் வாய்ந்த அவருடைய ஒளிவட்டம், அந்த பேனர்களில் உள்ள அனைத்து தலைவர்களையும் மங்கச் செய்து விடுகிறது. அவருடைய நினைவுகளை தூண்டுவதுதான் சேனா அரசியலின் துருப்புச் சீட்டு. இது போன்று மறைந்த பின்னும் நீடித்திருக்கும் அவருடைய ஆளுமையின் வழிபாடுதான், ஒரு அரசியல்வாதியாக பால் தாக்கரேயை அவருக்கென்றே சொந்தமான ஒரு இடத்திற்கு உயர்த்தியுள்ளது.
தன்னுடைய அரசியல் வாழ்க்கையில் பால் தாக்கரேயைப் போன்றே, ஜெயலலிதாவும் தனக்கென்று ஒரு மறுவாழ்வைப் பெற்றார். எண்ணிலடங்கா அம்மா பிராண்ட் திட்டங்களின் மூலம், அவருடைய உருவத்தை மீண்டும், மீண்டும் பொதுமக்கள் மனதில் அவரை நிலை நிறுத்தி, அவருடைய விசுவாசிகள் அவருடைய மரபை காப்பதனால், அரசியலில் வல்லாலாவுக்கு சமமான ஒரு நிலைக்கு உயர்த்தப்பட்டு, சாதாரண அரசியல்வாதி என்பதை விட மிக வலிமையான ஒருவராகி விடுவார்.

பிரத்யேகமான அந்தக் குழுவில் அங்கம் வகிக்க, பதவிக்காலத்தில் தன் அதிகாரத்தைத் திறம்பட காட்டினால் மட்டும் போதாது. தாக்கரே அல்லது ஜெயலலிதாவைப் போன்று மறைந்தப் பின்னும், அதே அளவு அரசியல் வலிமையை கொண்ட பிரதமந்திரி எவருமில்லை. ஒரு காலத்தில் பிரகாசித்த அடல் பிஹாரி வாஜ்பய் மற்றும் எல்.கே.அத்வானி போன்றவர்கள் கூட, தங்கள் கட்சியில் முதன்மை நிலமையில் இல்லை. மறைந்தப் பின் தங்களுடைய வழித்தோன்றல்களை விட இவர்கள் மேலோங்கி இருக்கப் போவதுமில்லை. அப்படி இருக்க வேண்டுமானால், அதற்கு பல காரணிகள் தேவை. பொதுமக்களின் இதயத்தையும், மனதையும் கவர வேண்டும். உங்கள் கட்சியில் சந்தேகத்துக்கு இடமின்றி, நீங்கள் உச்சக்கட்ட தலைவராக இருக்க வேண்டும். மேலும் முக்கியமாக, உங்கள் அதிகாரத்தின் உச்சத்தில் இருக்கும் போது, அதிகாரத்தை இழந்து, உங்கள் வீழ்ச்சி தவிர்க்க முடியாததாக ஆகிவிடக் கூடாது. இந்திராகாந்தியிடமும் இது போன்ற அம்சங்கள் இருந்தன. சர்ச்சைக்குரியதாக இருப்பினும், அவர் பெயர் இப்போதும் கவனத்தை கவரும் அளவிலுள்ள தலைவர் அவர். Neil young பாடினார் “மங்குவதை விட மறைவது மேல்” என்று.

இந்திரா மறைந்து 33 ஆண்டுகளும், தாக்கரே மறைந்து ஐந்து ஆண்டுகளும் கடந்துவிட்டன. இருப்பினும், அவர்களது நினைவுகள் அழிவதற்கான அறிகுறியே இல்லை. ஜெயலலிதாவிற்கும் அது போலத்தான் இருக்கும். அவருடைய தொண்டர்களின் நிலை எப்படி இருந்தாலும், அம்மாவை தமிழ்நாடு என்றும் மறவாது.

Comments